2023 ලෝක කුසලාන එක්දින ක්‍රිකට් තරගාවලියේ ශ්‍රී ලංකා කණ්ඩායම හා එංගලන්ත කණ්ඩායම අතර පැවති මූලික වටයේ 25 වන තරගයෙන් කඩුලු 8 ක විශිෂ්ට ජයක් ලබා ගැනීමට ශ්‍රී ලංකා කණ්ඩායම සමත් වුණා. තරගයේ කාසියේ වාසිය දිනාගත් එංගලන්ත කණ්ඩායම පළමුවෙන් පන්දුවට පහරදීමට තීරණය කළ අතර ඔවුන් පන්දුවාර 33 ක් තුළ සියලු දෙනා දැවී ලබා ගත්තේ ලකුණු 156 ක් පමණයි.
පන්දුවට පහරදීමේදී එංගලන්ත කණ්ඩායම වෙනුවෙන් බෙන් ස්ටෝක්ස් (Ben Stokes) ලකුණු 43 ක් හා ජොනි බෙයාස්ටෝ (Jonny Bairstow) ලකුණු 30 ක් ලබා ගත්තා. පන්දු යැවීමේදී ශ්‍රී ලංකා කණ්ඩායම වෙනුවෙන් ළහිරු කුමාර කඩුලු 3 ක්, ඇන්ජලෝ මැතිව්ස් හා කසුන් රාජිත කඩුලු 2 බැඟින් හා මහීෂ් තීක්ෂණ එක් කඩුල්ලක් බිඳ හෙළීමට සමත් වුණා.
පිළිතුරු ඉනිම ක්‍රීඩා කළ ශ්‍රී ලංකා කණ්ඩායම 26 වන පන්දුවාරය තුල කඩුලු 2 ක් දැවී සිටියදී සිය ජයග්‍රාහී ඉලක්කය පසුකර ගියා. පන්දුවට පහරදීමේදී නොදැවී පන්දුවට පහරදුන් පැතුම් නිස්සංක ලකුණු 77 ක් හා සධීර සමරවික්‍රම ලකුණු 65 ක් ලබා ගැනීමට සමත් වුණා. පන්දු යැවීමේදී එංගලන්ත කණ්ඩායම වෙනුවෙන් ඩේවිඩ් විලි (David Willey) කඩුලු 2 ක් බිඳ හෙළීමට සමත් වුණා.
ඒ අනුව 2023 ලෝක කුසලාන එක්දින ක්‍රිකට් තරගාවලියේ ඊයේ (26) දිනය අවසන් වන විට ප්‍රසාද ලකුණු සටහනේ 5 වන ස්ථානය දක්වා ඉදිරියට පැමිණීමට ශ්‍රී ලංකා කණ්ඩායම සමත් වුණා.
Buzzer.lk සහ Buzzer Sports සමඟ සම්බන්ධ වීමෙන් තවත් ක්‍රීඩා පුවත් සහ තොරතුරු දැන ගන්න.
