ඉරානය සමඟ නැවත යුද්ධයක් ආරම්භ කරන බවට අමෙරිකානු ජනාධිපති ඩොනල්ඩ් ට්රම්ප් අනතුරු අඟවීමක් සිදු කර තිබේ.
තාවකාලික සාම ගිවිසුමක් යටතේ පැවැත්වෙන පළමු සාකච්ඡාව සඳහා අමෙරිකානු උප ජනාධිපති ජේ.ඩී. වෑන්ස් ඉරාන නිලධාරීන් සමග සාකච්ඡා පවත්වන අතරතුර ඔහු මෙම ප්රකාශය සිදු කර ඇත.
ස්විට්සර්ලන්තයේ පැවැත්වෙන මෙම සාකච්ඡාව දෙපාර්ශ්වය අතර යුද්ධය අවසන් කිරීම සඳහා පසුගිය සතියේ එළඹි අවබෝධතා ගිවිසුමේ කොන්දේසි යටතේ පැවැත්වෙන පළමු සාකච්ඡාව වේ.
මේ හරහා අප්රේල් මාසයේ සිට පැවති සටන් විරාමය අවම වශයෙන් තවත් දින 60කින් දීර්ඝ කිරීමට නියමිත බව විදෙස් මාධ්ය වාර්තා කර තිබේ.
ගෝලීය බලශක්ති නැව්ගත කිරීම් සඳහා ප්රධානතම මාවතක් වන හෝමුස් සමුද්ර සන්ධිය නැවත විවෘත කිරීමටත්, ලෙබනනයේ යුද්ධය නැවැත්වීමටත් මෙම ගිවිසුම මඟින් ඉල්ලීම් කර තිබුණි.
කෙසේවෙතත් ලෙබනනයේ සටන් නැවැත්වීම සඳහා අමෙරිකාව අපොහොසත් වී ඇති බවට තර්ක කරමින්, තමන් හෝමූස් සමුද්ර සන්ධිය හරහා සිදුවන සමුද්රීය ගමනාගමනය නැවත වරක් නතර කළ බව ඉරානය ප්රකාශ කළේය.
එමෙන්ම පැවැත්වෙන සාකච්ඡාවලදී ඉරානයේ න්යෂ්ටික වැඩසටහන වැනි ප්රධාන කරුණු පිළිබඳව සාකච්ඡා නොකරන බවත් එහිදී ඔවුන් වැඩිදුරටත් සඳහන් කර සිටී.
මේ අතර ට්රම්ප් සමාජ මාධ්ය ඔස්සේ සටහනක් තබමින් ප්රකාශ කළේ ලෙබනනයේ සිටින ඉරානයේ ඉහළ වැටුප් ලබන නියෝජිත කණ්ඩායම් ප්රශ්න ඇති කිරීම වහාම නැවැත්විය යුතුයි යන්නයි.
“ඔවුන් එසේ නොකළහොත්, අප පසුගිය සතියේ කළා වගේම, හැබැයි ඊට වඩා බෙහෙවින් දරුණු ලෙස ඉරානයට නැවතත් දැඩි ප්රහාර එල්ල කරනවා!!!” ලෙස ද ට්රම්ප් එරට මාධ්ය වෙත අදහස් දක්වමින් පවසා ඇත.
එහිදී ඔහු ඉරාන නිලධාරීන්ට පවසා ඇත්තේ ඔවුන් සමුද්ර සන්ධිය වසා දැමුවහොත් “ඔවුන්ට රටක් ඉතිරි නොවන” බවය.
එමෙන්ම එම මුහුදු මාර්ගයේ පාලනය තමන් යටතට ගන්නා බවටද ඔහු තර්ජනය කර තිබේ.
