ශ්රී ලාංකික දඟ පන්දු යවන්නන් හමුවේ පහරදීමට තමන් සතු පිතිකරු තාක්ෂණය ප්රමාණවත් නැතැයි නැවත වතාවක් ඔප්පු කර පෙන්වූ කොදෙව්වෝ පල්ලෙකැළේ ක්රීඩාංගණයේදී අද (23 වැනිදා) පැවැති දෙවැනි එක්දින තරගයේදී කඩුලු 5 ක පරාජයකට මුහුණ දුන්හ. ඕවර 36 කදී ලකුණු 189 කට දැවී ගිය කොදෙව් පිල පරාජය කිරීම සඳහා ශ්රී ලංකා පිතිකරුවන්ට අවශ්ය වූයේ ඕවර 38.2 ක් පමණි.
වර්ෂාවෙන් බාධා ඇතිවූ හෙයින් ප්රමාද වී ආරම්භ වූ තරගය ඕවර 44 කට සීමා කරන ලදි.
අද දිනයේ ලබාගත් ජයත් සමගින්, තරගයක් ඉතිරිව තිබියදීම, එක්දින තරගාවලිය 2-0 ක් ලෙසින් ජයගැනීමට ශ්රී ලංකා ක්රීඩකයෝ සමත් වූහ. චිත්තාකර්ශනීය පිතිහරඹයක නිරත වූ නායක චරිත් අසලංක (නොදැවී 62) පිට පිටම දෙවැනි අර්ධ ශතකයත් ලබාගනිමින් තම කණ්ඩායම ජයටැඹ කරා කැඳවාගෙන ගියේය. පන්දු 61 කට මුහුණ දුන් නායකයාගේ ඉනිම හතරේ පහර 7 කින් සහ දැවැන්ත හයේ පහරකින් සමන්විත විය.
මෙම වසරේදී එක්දින ජාත්යන්තර තරගාවලි 5 කට සහභාගි වූ ශ්රී ලංකා කණ්ඩායම එයින් තරගාවලි 4 ක්ම ජයගත්තේය. බංග්ලාදේශයට එරෙහිව බංග්ලාදේශයේදී පැවැති එක්දින තරගාවලිය පමණක් 2-1 ක් ලෙසින් පරාජය විය.. ඇමරිකාවේ සහ කොදෙව් දූපත් සමූහයේදී පැවැති විස්සයි-20 ලෝක කුසලාන තරගාවලිය හැරුණු විට, මෙම වසර තුළ සහභාගි වූ විස්සයි-20 තරගාවලි 5 න් 4 ක් ජයගැනීමටත් ශ්රී ලංකා කණ්ඩායම සමත් වී තිබේ.
එක්දින හෝ විස්සයි-20 ආකෘතියේ සීමිත ඕවර තරග සඳහා 2024 ශ්රී ලංකා කණ්ඩායමට ඉතාමත් සාර්ථක වර්ෂයකි.
කාසියේ වාසිය දිනාගත් ශ්රී ලංකා නායක චරිත් අසලංක, පන්දුවට පහර දීම සඳහා කොදෙව්වන් පිටියට යැවූයේ නැවත වරක් වර්ෂාවෙන් බාධා වුවහොත් ඇතිවුවහොත් ඩක්වර්ත් – ලුවිස් න්යායේ පීඩනවට මුහුණදීමට සිදුවන බැවිනි. එහෙත් ශ්රී ලාංකික දඟ පන්දු යවන්නන් හමුවේ කොදෙව්වෝ නිරුත්තර වූහ.
කොදව්වෝ ඕවර 16 කදී ලකුණු 58 කට කඩුලු 8 ක්ම අහිමි කරගත්හ. එහෙත් උඩපන්දු දෙකක් සමගින් ශ්රී ලාංකිකයන් වෙතින් ගිළිහී ගිය වාසිය මිට මොළවාගත් කොදෙව්වෝ ඕවර 36 කින් ලකුණු 189 ක් ලබාගත්හ.
9 වැනි කඩුල්ල වෙනුවෙන් ලකුණු 119 ක වාර්තාගත සම්බන්ධතාවක් පැවැත්වූ ශර්ෆේන් රදර්ෆර්ඩ් (80) සහ ගුඩාකේෂ් මෝති (නොදැවී 50) එක්දින තරග ඉතිහාසයේ 9 වැනි කඩුල්ල වෙනුවෙන් ගොඩනැංවූ සිව්වැනි හොඳම සම්බන්ධතාවට සම්මාදම් වූහ. එක්දින තරගවලදී 9 වැනි කඩුල්ල සඳහා වන ලෝක වාර්තාව තවමත් ඇන්ජලෝ මැතිව්ස් සහ ලසිත් මාලිංග දෙදෙනා සතුව පවතී. එය වසර 2010 දී ඕස්ටේ්රලියාවට එරෙහිව මෙල්බර්න් නුවරදී ගොඩනැංවූ ලකුණු 132 ක සම්බන්ධතාවකි.
17 වැනි ඕවරයේ සිට තරගයේ තාලය වෙනස් කළ මෙම පිතිකරුවෝ දෙදෙනා, ආක්රමණය හොඳම ආරක්ෂාව යයි සිහිපත් කරමින් ඉවක් බවක් නැතිව ශ්රී ලාංකික පන්දු යවන්නන්ට පහර දෙන්නට වූහ. ප්රතිඵලය වූයේ ඕවර 19 කින් ලකුණු 119 ක් කොදෙව් පිලට එක්වීමයි. දෙදෙනා අතර සම්බන්ධතාව බිඳී යන විට ලකුණු පුවරුව කඩුලු 9 ට 177 ක් ලෙසින් වෙනස් වී තිබිණ.
රදර්ෆර්ඩ් ලකුණු 23 ක් ලබා සිටියදී අසිත ප්රනාන්දුගේ පන්දුවකට දුන් පහසු උඩපන්දුවක් ජනිත් ලියනගේගේ දෑත් අතරින් රිංගා බිම පතිත නොවූයේ නම් මුලු ලකුණු සංඛ්යාව 99 ක් ව තිබියදී 9 වැනි කඩුල්ලත් බිම දමාගත හැකිව තිබිණ. එහෙත් අසිත ප්රනාන්දුගේ ඊළඟ පන්දුව මිඩ් විකට් කලාපය හරහා හතරේ සීමාවට යැවූ රදර්ෆර්ඩ්, පන්දු 57 කදී සිය අර්ධ ශතකය සම්පූර්ණ කරන විට හතරේ පහර 4 ක් සහ හයේ පහර 3 ක් සිය ඉනිමට ඇතුළත් කර තිබිණ. රදර්ෆර්ඩ්ගේ පන්දු 82 ඉනිම හතරේ පහර 7 කින් සහ දැවැන්ත හයේ පහර 4 කින් අලංකෘත විය.
රදර්ෆර්ඩ්ට විශිෂ්ට සහයෝගයක් දුන් මෝති, පන්දු 61 කින් ලකුණු 50 ක් ලබාගත්තේ පිටියට පැමිණෙන විට 3.62 ක්ව තිබූ ලකුණු ලබාගැනීමේ වේගය 5.25 ක් දක්වා ඉහළ දමමිනි.
ශ්රී ලංකාව සහ කොදෙව් පිලට අතර තුන්වැනි සහ අවසන් එක්දින තරගය ලබන සෙනසුරාදා (26 වැනිදා) පල්ලෙකැළේ ක්රීඩාංගණයේදීම පැවැත්වේ.
