සංචාරක ශ්‍රී ලංකා කණ්ඩායම හා නවසීලන්ත කණ්ඩායම අතර පැවති පළමු විස්සයි විස්ස තරගයේ සුපිරි පන්දුවාරයෙන් ජය ලබා ගැනීමට ශ්‍රී ලංකා කණ්ඩායම සමත් වුණා. ඒ අනුව තරගයේ කාසියේ වාසිය දිනාගත් නවසීලන්ත කණ්ඩායම පළමුවෙන් පන්දුවට පහරදීමට ශ්‍රී ලංකා කණ්ඩායමට ආරාධනා කළ අතර ඔවුන් සිය පන්දුවාර 20 තුළ කඩුලු 5 ක් දැවී ලකුණු 196 ක් ලබා ගැනීමට සමත් වුණා.
පන්දුවට පහරදීමේදී ශ්‍රී ලංකා කණ්ඩායම වෙනුවෙන් කුසල් ජතිත් පෙරේරා නොදැවී ලකුණු 53 ක්, චරිත් අසලංක ලකුණු 67 ක්, කුසල් මෙන්ඩිස් ලකුණු 25 ක් හා ධනංජය ද සිල්වා ලකුණු 15 ලබා ගත්තා. පන්දු යැවීමේදී නවසීලන්ත කණ්ඩායම වෙනුවෙන් ජේම්ස් නීෂම් (James Neesham) කඩුලු 2 ක් හා ඇඩම් මිල්නේ (Adam Milne), බෙන්ජමින් ලිස්ටර් (Benjamin Lister), හෙන්රි ෂිප්ලි (Henry Shipley) එක් කඩුල්ල බැගින් බිඳ හෙළිමට සමත් වුණා.
පිළිතුරු ඉනිම ක්‍රීඩා කළ නවසීලන්ත කණ්ඩායමට සිය පන්දුවාර 20 තුළ ලකුණු 196 ක් ලබා ගනිමින් තරගය සම තත්ත්වයට ගෙන ආ අතර ඒ හේතුවෙන් තරගයේ ජයග්‍රහණය තීරණය කිරීමට සුපිරි පන්දුවාරයක් ක්‍රියාත්මක කළා. සුපිරි පන්දුවාරයේ පළමුවෙන් පන්දුවට පහර දුන් නවසීලන්ත කණ්ඩායම කඩුලු දෙකක් දැවී ලකුණු 8 ක් ලබාගත්තා.
පිළිතුරු ඉනිම ක්‍රීඩා කළ ශ්‍රී ලංකා කණ්ඩායම සුපිරි පන්දුවාරයේ 3 වන පන්දුවේදී සිය ජයග්‍රාහි ඉලක්කය පසුකර යාමට සමත් වුණා.
Buzzer.lk සහ Buzzer Sports සමඟ සම්බන්ධ වීමෙන් තවත් ක්‍රීඩා පුවත් සහ තොරතුරු දැන ගන්න.
