දෙරට අතර සබඳතා ශක්තිමත් කරමින් ජාත්‍යන්තර මූල්‍ය අරමුදල (IMF) සමඟ ශ්‍රී ලංකාවේ ආර්ථික වැඩපිළිවෙළ සහ රටේ සංවර්ධන කටයුතු සඳහා අඛණ්ඩව සහය ලබාදීමට ජපානය සූදානම් බව ශ්‍රී ලංකාවේ ජපාන තානාපති Mizukoshi Hideaki මහතා පැවසීය.
ජපාන තානාපතිවරයා ඊයේ (01) පස්වරුවේ කොළඹ ජනාධිපති මන්දිරයේ දී ජනාධිපති ගෝඨාභය රාජපක්ෂ මහතා හමුවූ අවස්ථාවේදී මෙම අදහස් පළ කරන ලදී.
ශ්‍රී ලංකාව සමඟ ආර්ථික, සමාජීය සහ සංස්කෘතික සබඳතා තවදුරටත් ශක්තිමත් කර ගැනීමට අඛණ්ඩ උත්සාහයක් ගන්නා බව Mizukoshi Hideaki වැඩිදුරටත් ප්‍රකාශ කළා.
ජපානය ශ්‍රී ලංකාවට ලබාදෙන සහය පිළිබඳව ජනාධිපතිතුමා සිය බලවත් කෘතඥතාව පළ කර තිබේ.
මේ අතර, ජපානය ශ්‍රී ලංකාවට සහාය නොදක්වන බවට ජපාන තානාපති මිසුකෝෂි හිඩේකිට ආරෝපණය කර ඇති බවට මෑතකදී පළ වූ මාධ්‍ය වාර්තා ප්‍රතික්ෂේප කරන බව කොළඹ ජපාන තානාපති කාර්යාලයේ නියෝජ්‍ය ප්‍රධානී කොටාරෝ කටුසුකි පවසයි.
ජපාන තානාපතිවරයා එසේ ප්‍රකාශ කර නොමැති බව කටුසුකි අග්‍රාමාත්‍ය ලේකම් සමන් දිසානායක මහතාට දන්වා ඇතැයි ආරංචි මාර්ග සඳහන් කරයි. ඔහු කියා සිටියේ අදාළ වාර්තාවට කිසිදු පදනමක් නොමැති බවයි.
