සෞඛ්‍ය අමාත්‍යාංශයේ නියෝජ්‍ය අධ්‍යක්ෂ ජනරාල් (රසායනාගාර සේවා) වෛද්‍ය සුදත් ධර්මරත්න මහතා ඊයේ (02) ප්‍රකාශ කළේ කොවිඩ් 19 ආසාදිතයන් හඳුනාගැනීම සඳහා වෛද්‍ය සැපයුම් අංශය සතුව කඩිනම් ප්‍රතිදේහජනක පරීක්ෂණ කට්ටල ලක්ෂ 5කට අධික ප්‍රමාණයක් ඇති බවයි.
කොවිඩ් 19 වෛරසය ආසාදනය වී ඇති බවට සැකයක් ඇත්නම් රෝහලක බාහිර රෝගී අංශයට ගොස් වේගවත් ප්‍රතිදේහජනක පරීක්‍ෂණයක් කර ගත හැකි බවත් ඒ සඳහා අවශ්‍ය පහසුකම් රජය සතුව පවතින බවත් ඔහු පැවසීය.
වේගවත් ප්‍රතිදේහජනක පරීක්ෂණයේ ප්‍රතිඵල පැය භාගයක් වැනි කෙටි කාලයකදී දැනගත හැකිය.
රට පුරා පිහිටුවා ඇති රසායනාගාර 26කට අධික සංඛ්‍යාවක කොවිඩ් සහ ප්‍රතිදේහජනක පරීක්ෂණ පහසුකම් ඇති PCR පරීක්ෂණ පවතින බව ඔහු පැවසීය.
Covid-19 BA5 වෛරසයේ නව ප්‍රභේදය රට පුරා ප්‍රදේශයන්හි ශීඝ්‍රයෙන් ව්‍යාප්ත වෙමින් පවතින අතර, ආසාදිතයන් හඳුනාගෙන ඔවුන් සුරක්ෂිතව තබා ගැනීමෙන් වෛරසය තවදුරටත් පැතිරීම වළක්වා ගත හැකි බව සෞඛ්‍ය දෙපාර්තමේන්තුව පෙන්වා දෙයි.
සඳුදා (01) දිනයේදී නව කොවිඩ්-19 රෝගීන් 108 දෙනෙකු හඳුනා ගැනීමත් සමඟ මේ වන විට රෝගීන් 665,847 ක් හඳුනාගෙන ඇති බව වසංගත රෝග විද්‍යා දෙපාර්තමේන්තුව පවසයි.
ආසාදිතයින් 648,154 දෙනෙකු සුවය ලබා ඇති අතර ආසාදිතයින් 1134 දෙනෙකු රෝහල්වල සහ නිවාසවල ප්‍රතිකාර ලබන බවයි එම දෙපාර්තමේන්තුව පවසන්නේ.
කොවිඩ් වෛරසය ආසාදනය වූ පුද්ගලයින් 16,559 දෙනෙකු මියගොස් තිබේ.
