පවතින ආර්ථික අර්බුදයෙන් දැඩි ලෙස පීඩාවට පත්ව සිටින ශ්‍රී ලංකාවේ ආදායම ඉහළ නැංවීමට රජය පියවර කිහිපයක් ගෙන තිබේ.
2019 දී රජය විසින් අගය එකතු කළ බද්ද (Value-aded Tax), පුද්ගල ආදායම් බදු සහ ආයතනික ආදායම් බදු අනුපාත අඩු කිරීමට මෙන්ම එකතු කළ අගය මත බදු සහ ආදායම් බදු මත බදු පදනම හැකිලීමට තීරණය කර තිබූ අතර, එහි ප්‍රතිඵලයක් ලෙස රජයේ ආදායම සැලකිය යුතු පහත වැටීමක් සිදු විය.
මෙම තත්ත්වය තුළ, රාජ්‍ය ආදායම ඉහළ නැංවීම සඳහා අවශ්‍ය පනත් කෙටුම්පත් සංශෝධනය කිරීම සඳහා මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා වශයෙන් අග්‍රාමාත්‍යවරයා විසින් යෝජනාවක් ඉදිරිපත් කර ඇත.
එමගින් පහත සඳහන් පනත් සංශෝධනය කිරීමට අවශ්‍ය පනත් කෙටුම්පත් සකස් කරන ලෙස නීති කෙටුම්පත් සම්පාදකයින්ට උපදෙස් දීමේ යෝජනාව අමාත්‍ය මණ්ඩලය විසින් අනුමත කර ඇත.
- 2017 අංක 24 දරණ දේශීය ආදායම් පනත
- 2002 අංක 14 දරණ එකතු කළ අගය මත බදු පනත
- 2011 අංක 21 දරණ විදුලි සංදේශ බදු පනත
- 1988 අංක 40 දරණ ඔට්ටු ඇල්ලීම සහ සූදු බදු පනත
- 2003 අංක 3 දරණ රාජ්‍ය මූල්‍ය කළමනාකරණ (වගකීම්) පනත
