නව අමාත්‍ය ධුර දෙකක් ඇති කරමින් ගැසට් නිවේදනයක් නිකුත් කර තිබෙනවා.
ගැසට් පත්‍රයට අනුව, නව අමාත්‍යාංශ වන්නේ තාක්ෂණ හා ආයෝජන ප්‍රවර්ධන අමාත්‍ය සහ කාන්තා, ළමා කටයුතු සහ සමාජ සවිබල ගැන්වීම් අමාත්‍ය.
ජනාධිපති ගෝඨාභය රාජපක්ෂ මහතා විසින් පසුගිය මැයි 27 වැනිදා නිකුත් කළ ගැසට් නිවේදනය සංශෝධනය කරමින් ඊයේ (09) රාත්‍රියේ ගැසට් නිවේදනය නිකුත් කළේය.
විදුලි සංදේශ නියාමන කොමිෂන් සභාව (TRC), ආයෝජන මණ්ඩලය (BOI), ශ්‍රී ලංකා ටෙලිකොම්, පුද්ගලයන් ලියාපදිංචි කිරීමේ දෙපාර්තමේන්තුව, ආගමන හා විගමන දෙපාර්තමේන්තුව, වරාය නගර ආර්ථික කොමිෂන් සභාව, ප්‍රමිති ආයතනය, ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) , සහ නෙළුම් කුළුණ තාක්ෂණ හා ආයෝජන ප්‍රවර්ධන අමාත්‍යවරයා යටතට වැටේ.
මේ අතර, කාන්තාවන් පිළිබඳ ජාතික කමිටුව, ශ්‍රී ලංකා කාන්තා කාර්යාංශය, පරිවාස හා ළමාරක්ෂක සේවා දෙපාර්තමේන්තුව, ජාතික ළමා ආරක්ෂක අධිකාරිය, සමෘද්ධි සංවර්ධන දෙපාර්තමේන්තුව සහ සෞභාග්‍ය සංවර්ධන කාර්යාංශය කාන්තා, ළමා කටයුතු සහ සමාජ සවිබල ගැන්වීම් අමාත්‍යවරයා යටතට පත් වේ.
