අනුප්‍රාප්තික ජනාධිපති නාමයෝජනා කැදවීම අද
හිටපු ජනපති ගෝඨාභය රාජපක්ෂ මහතාගේ ඉල්ලා අස්වීමෙන් පසු හිස්වූ ජනපති අසුන වෙනුවෙන් සහ හිටපු ජනපතිගේ ඉතිරි ධුරකාලය වෙනුවෙන් අනුප්‍රාප්තික ජනාධිපතිවරයකු තෝරා පත්කරගැනීම සඳහා ව්‍යවස්ථානුකුලව සහ කථානායකවරයාට ඇති බලතල ප්‍රකාරව නාමයෝජනා කැඳවීම අද දින සිදුකිරීමට නියමිතයි. දැනට අපේක්ෂකයන් හතර දෙනෙකුගේ නම් පිළිබඳව පාර්ලිමේන්තුවෙන් පිටත කතාබහක් ඇතිවී තිබුනද නීත්‍යනුකුලව අද දින කථානායකවරයා ඉදිරියේ එම නාම යෝජනා බාරදීමෙන් පසු එම අපේක්ෂකයන් වෙත අපේක්ෂකත්වයේ නීත්‍යනුකුල භාවය ලැබෙනවා සමගම නිල වශයෙන් ජනතාවටද එම අපේක්ෂකයන් කවරෙක්ද යන වග දැනගැනීමට ලැබෙනවා.
අද දින (19) නාම යෝජනා භාරදීමෙන් පසු හෙට දිනයේ පාර්ලිමේන්තුවේ රහස් ඡන්දයකින් ඡන්දබලය හිමි පාර්ලිමේන්තු මන්ත්‍රීවරුන් 225 දෙනෙකුගේ ( කතානායක සමග) 50% බහුතර ඡන්ද ප්‍රතිශතයක් ලබා ගන්නා අපේක්ෂකයා අනුප්‍රාප්තික ජනාධිපති ලෙස ඉදිරි වසර කිහිපය කටයුතු කිරීමට නියමිතව තිබේ.
මින් පෙර 1993 දී එවක හිටපු ජනපති රණසිංහ ප්‍රේමදාස ජනාධිපතිගේ අභාවයෙන් පසු වැඩ බලන ජනපති ලෙස ඩිංගිරි බැඳ විජේතුංග මහතා පත්කර ගැනීම වෙනුවෙන්ද රහස් චන්දයක් පවත්වනු ලැබුවා. නමුත් එවක අපේක්ෂකයකු ලෙස ඉදිරිපත් කරනු ලැබුවේ ඩිංගිරි බැඳ විජේතුංග මහතා ආණ්ඩුපක්ෂය ( එක්සත් ජාතික පක්ෂය ) විසින් ඉදිරිපත් කරනු ලැබුවා.
මේ අතර පාර්ලිමේන්තුව සහ ඒ අවට ප්‍රදේශ වල විශේෂ ආරක්ෂක වැඩසටහනක් සහ රථවාහන ගමන්කිරීම පිලිබඳ වැඩසටහනක් අද (19) සහ හෙට (20) දිනය පුරා ක්‍රියාත්මකයි. වර්තමානයේ හදිසි නීති තත්වයක් රටතුල ප්‍රකාශයට පත්කර ඇති අතර පසුගිය දිනක වත්මන් වැඩ බලන් ජනපති රනිල් වික්‍රමසිංහ කියා සිටියේ උද්ගතව ඇති කැරලි සහ කෝලාහල තත්වයන් පාලනයට උපරිම බලය යෙදවීමට ආරක්ෂක අංශ වලට පවරා ඇති බවයි.
ඒවගේම ආරක්ෂක මාණ්ඩලික ප්‍රධානි ජනරාල් ශවේන්ද්‍ර සිල්වා මහතා ප්‍රකතයක් කරමින් පැවසුවේ, වර්තමානයේ රට පත්ව ඇති ආර්ථික අර්බුදයෙන් මිදීමට අවශ්‍ය රටේ දේශපාලන ස්ථාවරත්වය ඇතිකරලීමට ව්‍යවස්ථානුකුලව සහ නීතියට අනුකුලව දේශපාලන අධිකාරියෙන් ගන්නා තීරණ වලට, මහජනතාවට අවනතවන ලෙසත් සහ නීති විරෝධී ලෙස එම කටයුතු වලට බාධා නොකරන ලෙසත් එවන් සිද්ධියක් ඇති උවහොත් ආණ්ඩුක්‍රම ව්‍යවස්ථාවේ ආරක්ෂක අංශ වලට ලබා දී ඇති නිත්‍යානුකුල බලයන් සහ විධානයන් අනුව රටේ නිතිය සහ සාමය ආරක්ෂා කරගැනීම සඳහා අවශ්‍ය කරන උපරිම බලය යෙදවීමටත් සිදුවන බවයි.
