සංචාරක නවසීලන්ත පිල සමඟ පැවැත්වෙන දෙවැනි ටෙස්ට් තරගයේදී ශ්‍රී ලංකාව මුල් ඉනිමට කඩුලු 3ක් දැවී ලකුණු 306ක් ලබා සිටියදී ඊයේ පළමු දිනය නිමාවට පත් විය. නායකත්වයට පත්වීමෙන් අනතුරුව පිට පිට 6 වැනි වරටත් කාසියේ වාසිය දිනාගත් ධනංජය ද සිල්වා ගාලු තණතිල්ල පිතිකරුවන්ට වාසිදායක බව සිතා පළමුව පන්දුවට පහරදීමට ගත් තීරණය සාධාරණීකරණය කරමින් ශ්‍රී ලංකා ඉනිමට දිනේෂ් චන්දමාල් ශතකයක් හා ඇන්ජලෝ මැතිව්ස්, කමිඳු මෙන්ඩිස් අර්ධ ශතක එක් කළහ.
කමිඳු මෙන්ඩිස් මේ දක්වා සහභාගි වූ පළමු ටෙස්ට් තරග 8කදී ලකුණු 50ට වැඩියෙන් ලබා ටෙස්ට් ක්‍රිකට් වාර්තා පොතට නව ලෝක වාර්තාවක් එක් කිරීම ඊයේ දිනයේ සුවිශේෂී සිදුවීම විය. පාකිස්තාන ක්‍රීඩක සවුද් ෂකීල් 2022දී සිය පළමු ටෙස්ට් තරග හතේදී ලකුණු 50 සීමාව ඉක්මවා රැස් කොට පිහිටුවා තිබූ ලෝක වාර්තාව කමිඳු ඊයේ බිඳ හෙළා දැමුවේය.
දිවා විවේකය වෙද්දී ශ්‍රී ලංකා පිල ඕවර 32කදී කඩුල්ලක් දැවී ලකුණු 102ක් ලබා සිටි අතර, දිවා විවේකයෙන් පසු කඩුලු 2ක් බිඳ වැටී තවත් ලකුණු 204ක් එකතු විය. පෙරවරු කාලයේ සිහින් සිරිපොදක් ගාලු ක්‍රීඩාංගණයට ඇද හැලීමෙන් තරගය මිනිත්තු 21ක කාලයක් අත්හිටුවීමට සිදු වුවද දිනයේ නියමිත ඕවර 90 සම්පූර්ණ කරනතුරු තරගය ගෙනයෑමට විනිසුරුවෝ කටයුතු කළහ.
පළමු දිනයේ ‘දවසේ ක්‍රීඩකයා’ බවට පත්වූ දිනේෂ් චන්දිමාල් තම 16 වැනි ටෙස්ට් ශතකය වාර්තා කළ අතර, මිනිත්තු 271ක කාලයක් තුළදී පන්දු 208කට මුහුණ දෙමින් හතරේ පහර 15ක් සමඟ ලකුණු 116ක් ලබා ගත්තේය. එය චන්දිමාල් ගාලු ක්‍රිකට් පිටියේ ලබාගත් 6 වැනි ටෙස්ට් ශතකය ලෙස සටහන් විය. චන්දිමාල් ලකුණු 100 පසු කරද්දී මිනිත්තු 220ක කාලයක් ගත කරමින් පන්දු 171කට මුහුණදී සිටි අතර, එවිට හතරේ පහර 13ක් එල්ල කොට තිබිණි. දකුණත් පිට දඟ පන්දු යවන ග්ලේන් පිලිප්ස්ගේ පන්දුවක් කෙළින්ම කඩුල්ල තුළටම දඟ කැවී චන්දිමාල් දැවී ගියේය. චන්දිමාල් – මැතිව්ස් තෙවැනි කඩුල්ලේ සබඳතාව ලකුණු 97ක් වූ අතර, දෙදෙනා මිනිත්තු 128ක් කඩුල්ලේ රැඳී සිටිමින් පන්දු 205කට මුහුණ දුන්හ.
ඇන්ජලෝ මැතිව්ස් තම 44 වැනි ටෙස්ට් අර්ධ ශතකය ඊයේ වාර්තා කළ අතර එය ගාලු තණතිල්ලේ ඔහු රැස් කළ 16 වැනි ටෙස්ට් අර්ධ ශතකය විය. මැතිව්ස් දිනය නිමාවෙද්දී පන්දු 208කට මුහුණදී හතරේ පහර 6ක් සමඟ නොදැවී ලකුණු 78ක් ලබා සිටියේය. අනෙක් අන්තයේ සිටින කමිඳු මෙන්ඩිස් ඊයේ දිනයේ එල්ල වූ එකම හයේ පහර සමඟ පන්දු 56කදී හතරේ 8ක් සමඟ නොදැවී ලකුණු 51ක් ලබා ගත්තේය.
ආරම්භක පිතිකරු පැතුම් නිශ්ශංකට ඊයේ දිනය එතරම් සුබදායක නොවූ අතර, තරගයේ ටිම් සවුති යැවූ පළමු ඕවරයේදීම කඩුලු රකින බ්ලන්ඩෙල් අතට උඩ පන්දුවක්දී ලකුණු 1කට දැවී ගියේය. අනතුරුව දිමුත් හා චන්දිමාල් එක්ව දෙවැනි කඩුල්ලට පන්දු 229කදී ලකුණු 122ක සබඳතාවක් ගොඩනැඟීමට සමත්වීම කැපී පෙනිණි. මිනිත්තු 144ක කාලයක් කඩුල්ලේ රැඳී සිටි දිමුත් කරුණාරත්නගේ 40 වැනි ටෙස්ට් අර්ධ ශතකයට ලකුණු 4ක් අඩුව තිබියදී ඔහු දුවද්දී දැවී යෑමෙන් ලකුණු වේගය තරමක් අඩාළ විය. ලකුණු 46කට දැවී ගිය දිමුත් ‘මිඩ් විකට්’ දෙසට පහරක් එල්ල කරමින් ලකුණක් කරා දිව ගියද චන්දිමාල්ගේ කිසිදු සූදානමක් නොවීය. දිමුත් යළි පිතිකරුගේ විකට්ටුව දෙසට ආපසු හැරී දිව ගියද එවිට ග්ලේන් පිලිප්ස් පන්දුව කඩුල්ලට යොමු කිරීමෙන් ක්‍රීඩාගාරයට යෑමට සිදු විය.
ශ්‍රී ලංකා ටෙස්ට් ක්‍රිකට් ඉතිහාසයේ බිහිවූ ක්‍රීඩකයන් බොහෝ දෙනකුට එක හා සමාන වාසගම් තිබුණද, පීරිස් වාසගම සහිත පරපුරෙන් බිහිවූ එකම ක්‍රීඩකයා ලෙස ඊයේ ටෙස්ට් වරම් දිනා ගැනීමට නිශාන් පීරිස් වාසනාවන්ත වූවේය. ශ්‍රී ලංකා ක්‍රිකට් තේරීම් කමිටු සාමාජික දිල්රුවන් පෙරේරා මහතාගේ අතින් 27 හැවිරිදි නිශාන් පීරිස් ශ්‍රී ලංකාවේ 167 වැනි ටෙස්ට් ක්‍රිකට් ක්‍රීඩකයා ලෙස ටෙස්ට් හිස්වැස්ම ලබා ගත්තේය.
තරගයේ දෙවැනි දිනය අදයි.
