ජන හා සංඛ්යා ලේඛන දෙපාර්තමේන්තුවේ දත්ත වාර්තාවලට අනුව, ශ්රී ලංකාවේ දෛනික කිරි අවශ්යතාවෙන් මෙරට තුළ නිෂ්පාදනය කරනු ලබන්නේ 43%ක් වැනි ප්රතිශතයක් බව කෘෂිකර්ම නියෝජ්ය අමාත්ය නාමල් කරුණාරත්න මහතා අද (24) පාර්ලිමේන්තුවේදී පැවසීය.
මේ හේතුවෙන් වාර්ෂික කිරි නිෂ්පාදනය ලීටර මිලියන 410 සිට ලීටර මිලියන 1,200 දක්වා ඉහළ නැංවීම සඳහා මෙවර අයවැයෙන් රුපියල් මිලියන 1,000ක් වෙන් කර ඇති බව ද නියෝජ්ය අමාත්යවරයා මෙහිදී පෙන්වා දුන්නේය.
කිරි නිෂ්පාදනය ඉහළ නැංවීමේ අරමුණින් නිකවැරටිය අභිජනන ගොවිපොළ සංවර්ධනය කිරීම සඳහා ද තවත් රුපියල් මිලියන 1,000ක මුදලක් වෙන් කර ඇති බව අමාත්යවරයා සඳහන් කළේය.
අනාගතයේදී රටට අවශ්ය වන උසස් ප්රභේදයේ එළගව සහ මීගව ගැහැනු හා පිරිමි සතුන් බිහිකිරීමේ න්යෂ්ටික ගොවිපොළක් බවට නිකවැරටිය ගොවිපොළ පරිවර්තනය කිරීමට බලාපොරොත්තු වන බවද හෙතෙම පැවසීය.
නිකවැරටිය කිරි ගොවිපොළ සංවර්ධනය කිරීමේ ව්යාපෘතිය යටතේ තවත් ව්යාපෘති රැසක් මේ වන විටත් ක්රියාත්මක වෙමින් පවතින බවද ඔහු පෙන්වා දුන්නේය.
මීට අමතරව දේශීය කිරි ගොවීන්ගේ ජීවන තත්ත්වය නගාසිටුවීම සහ ඔවුන් දිරිමත් කිරීම වෙනුවෙන් රජය මැදිහත් වී ඇති බව අමාත්යවරයා අවධාරණය කළේය.
ඒ වෙනුවෙන් දැනටමත් ජාතික කිරි නිෂ්පාදන වැඩසටහන දීපව්යාප්තව ක්රියාවට නැංවීම, දිවයින පුරා පිහිටි සත්ව අභිජනන ගොවිපොළවල් නවීන තාක්ෂණයෙන් යුතුව වැඩි දියුණු කිරීම, දේශීය කිරි නිෂ්පාදනය ඉහළ නැංවීම සඳහා ගොවීන්ට අවශ්ය පහසුකම් සැපයීම වැනි ව්යාපෘති ක්රියාත්මක කර ඇති බව ඔහු පෙන්වා දුන්නේය.
