බාහිර ලෝකය ආලෝකවත් කරන්නා සේම, තමන්ගේ හදවත තුළ දයාව, කරුණාව සහ ප්රඥාව ආලෝකමත් කරගැනීමට මෙවර වෙසක් සමය අවස්ථාවක් කරගත යුතු බව අග්රාමාත්ය ආචාර්ය හරිනි අමරසූරිය පැවසීය.
සිය වෙසක් දින පණිවුඩය යොමුකරමින් අග්රාමාත්යවරිය වැඩිදුරටත් පවසා සිටින්නේ, අන්තගාමීත්වය බැහැර කොට මධ්යම ප්රතිපදාවේ ගමන් කරමින්, සොබාදහමට හිතැති, පරිසර හිතකාමී වෙසක් සැමරුමකට එක්වන ලෙසය.
අග්රාමාත්යවරියගේ වෙසක් දින පණිවුඩය
බුදුන් වහන්සේ වදාළ ශ්රී සද්ධර්මයට අනුව ජීවිතය හැඩගස්වා ගනිමින්, ආමිස පූජාවන්ට වඩා ප්රතිපත්ති පූජාවන්ට මුල්තැන දෙන අර්ථවත් වෙසක් මංගල්යයක් වේවායි මම ලක්වාසී සැමට ප්රාර්ථනා කරමි.
බාහිර ලෝකය ආලෝකවත් කරන්නා සේම, තමන්ගේ හදවත තුළ දයාව, කරුණාව සහ ප්රඥාව ආලෝකමත් කරගැනීමට මෙවර වෙසක් සමය අවස්ථාවක් කරගත යුතුය.
ලෝභ, ද්වේශ, මෝහ යන අකුසලයන් දුරුකරමින්, සාමය හා සැනසීම උදා කරගන්නා වූ පින්බර කාලසීමාවක් බවට මෙය පත්කර ගනිමු.
”අභිත්ථරෙථ කල්යාණේ” – පොදු යහපත පිණිස වහ වහා පෙළ ගැසෙමු. මෙවර රාජ්ය වෙසක් තේමාව කාලීන සමාජ අවශ්යතාව මැනවින් නිරූපණය කරන්නකි. පෞද්ගලික පටු අරමුණුවලින් බැහැරව, පොදු යහපත උදෙසා කැපවෙන, ධර්මයේ බැබළෙන දේශයක් උදා කර ගැනීමට මෙම වෙසක් මංගල්යය අපට ආශිර්වාදයක් හා ශක්තියක් විය යුතුය.
අතිපූජ්ය මහානායක ස්වාමීන්වහන්සේලාගේ සහ සමස්ත ලංකා ශාසනාරක්ෂක මණ්ඩලයේ අනුශාසනා පරිදි, බුද්ධශාසන, ආගමික සහ සංස්කෘතික කටයුතු අමාත්යාංශය හා රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්යාංශය ඒකාබද්ධව සංවිධානය කරනු ලබන රාජ්ය වෙසක් මහෝත්සවය සර්වප්රකාරයෙන් සාර්ථක වේවායි මම ප්රාර්ථනා කරමි.
රජය සහ බුදු දහම අතර පවතින ගැඹුරු බැඳීම තුළින්, දැහැමි පාලනයක් ඔස්සේ රටේ දියුණුව සහ සෞභාග්යය උදාකර ගත හැකිය. කුල, මල හෝ ආගම් භේදයකින් තොරව සැමට සාධාරණය ඉටුවන, “සියලු සත්වයෝ සුවපත් වෙත්වා” යන උදාර සංකල්පය මත පිහිටා රටක් ලෙස අප මුහුණ දෙන ආර්ථික හා සමාජීය අභියෝග ජයගැනීමට අවශ්ය ඉවසීම පුරුදු කිරීම මෙහිදී අත්යවශ්ය වේ.
අන්තගාමීත්වය බැහැර කොට මධ්යම ප්රතිපදාවේ ගමන් කරමින්, සොබාදහමට හිතැති, පරිසර හිතකාමී වෙසක් සැමරුමකට එක්වන ලෙස මම ඔබ සැමගෙන් ගෞරවයෙන් ඉල්ලා සිටිමි.
ප්රතිපත්තිගරුක සමාජයක් උදෙසා එක්ව පෙරට යමු!
සැමට පින්බර වෙසක් මංගල්යයක් වේවා!
