මරදාන සාන්ත ජෝශප් විද්යාලය සහ බම්බලපිටිය සාන්ත පීතර විද්යාලය අතර පැවති 49 වැනි එක්දින මහා ක්රිකට් තරගයෙන් කඩුලු 5ක ජයග්රහණයක් වාර්තා කිරීමට සාන්ත ජෝශප් කණ්ඩායම සමත්විය. කොළඹ සිංහල ක්රීඩා සමාජ ක්රීඩාංගණයේදී පැවති මෙම තරගයේ කාසියේ වාසිය දිනා පළමුවෙන් පන්දුවට පහර දුන් සාන්ත පීතර ක්රීඩකයින් සියල්ලන් දැවී ලකුණු 156ක් රැස් කළ අතර ශාන්ත ජෝශප් කණ්ඩායම පන්දු වාර 41යි පන්දු 5 කදී කඩුලු 5ක් දැවී එම ඉලක්කය පසුකර ගියේය.
ආරම්භක පිතිකරු ලෙස පැමිණ කැපී පෙනෙන ඉනිමක් ක්රීඩා කළ නේතන් ඩේවිඩ් පන්දු 79ක් තුළ ලකුණු 53ක් ලබා සිටිය දී අවින්තගේ පන්දුවකට දැවී ගියේ සාන්ත පීතර ක්රීඩකයින් දැඩි අසීරුතාවකට පත් කරමිනි. කැපී පෙනෙන පන්දු යැවීමක නිරත වූ අවින්ත ද අල්විස් ලකුණු 27කට කඩුලු 3ක් දවා ගැනීමට සමත් වෙද්දී, යෙනුල දෙව්තුස, ශෙවෝන් ඩැනියල් සහ ලහිරු අමරසේකර කඩුලු දෙක බැගින් දවා ගත්හ. ශාන්ත ජෝශප් කණ්ඩායම වෙනුවෙන් පන්දු 59කට මුහුණ දෙමින් හතරේ පහර හයක් සහ එක් හයේ පහරක් සමඟ ලකුණු 50ක් රැස් කිරීමට හිරුන් කපුරුබණ්ඩාර සමත් වූයේය.
ලහිරු අමරසිංහ ලකුණු 3කට දවා ගෙන සාන්ත ජෝශප් කණ්ඩායමට තවත් පීඩනයක් එල්ල කිරීමට පීතරයන්ට හැකි වූවත් ඉන් පසුව කඩුල්ලේ එක් වූ හිරාන් ජයසුන්දර සහ කෙනෙත් ලියනගේ ලකුණු 25ක නොබිඳුණු සම්බන්ධතාවක් ගොඩනගමින් කණ්ඩායමේ ජයග්රහණය තහවුරු කළහ. හිරාන් ජයසුන්දර නොදැවී ලකුණු 30ක් රැස් කළේ පන්දු 60කට මුහුණ දෙමිනි.
තරගයේ වීරයා: අවින්ත ද අල්විස් (සාන්ත ජෝශප් විද්යාලය), දක්ෂතම පිතිකරු: හිරුන් කපුරුබණ්ඩාර (සාන්ත ජෝශප් විද්යාලය), දක්ෂතම පන්දු යවන්නා: යෙනුල දෙව්තුස (සාන්ත ජෝශප් විද්යාලය), දක්ෂතම පන්දු රකින්නා: නේතන් ඩේවිඩ් (සාන්ත පීතර විද්යාලය)
(දිවයින)
Buzzer.lk සහ Buzzer Sports සමඟ සම්බන්ධ වීමෙන් තවත් ක්රීඩා පුවත් සහ තොරතුරු දැන ගන්න.
