ශ්රී ලාංකිකයන්ගේ පෞද්ගලික තොරතුරු සොයන, මැතිවරණ කොමිසමට සමාන ව්යාජ වෙබ් අඩවියක් පිළිබඳ මැතිවරණ කොමිසමට වාර්තා වී තිබේ.
ඒ අනුව ඒ පිළිබඳ විමර්ශනය කිරීම සඳහා මැතිවරණ කොමිසම පොලිස් සයිබර් අපරාධ අංශයේ සහාය ලබා ගැනීමට නියමිතය.
අදාළ වෙබ් අඩවිය පරිගණක හදිසි ප්රතිචාර සංසදය (CERT) විසින් දැනටමත් සොයා ගෙන ඇති අතර ඊට සත්කාරකත්වය සපයනු ලබන්නේ එක්සත් ජනපදය පදනම් කරගත් Google සේවාදායකයක් විසින් බව පැවසේ.
මැතිවරණ කොමසාරිස් ජනරාල් සමන් ශ්රී රත්නායක ප්රකාශ කර ඇත්තේ ගූගල් වෙතින් තොරතුරු ලබාගෙන එම වෙබ් අඩවියේ නිර්මාතෘවරයා පිළිබඳ විමර්ශනය කිරීම සඳහා අධිකරණ නියෝගයක් ලබා ගැනීමට පොලිස් සයිබර් අපරාධ කොට්ඨාසය වෙත ඉල්ලීමක් කිරීමට නියමිත බවයි.
පරිගණක හදිසි ප්රතිචාර සංසදය විසින් සිකුරාදා රාත්රියේ වෙබ් අඩවිය අනාවරණය කර ගෙන තිබිණි.
මැතිවරණ කොමිෂන් සභාව මැතිවරණ කටයුතු සඳහා පුද්ගලයන් බඳවා ගන්නා බව පවසමින් මෙම ව්යාජ වෙබ් අඩවිය WhatsApp, X සහ එවැනි පණිවිඩ හුවමාරු වේදිකා හරහා මහජනතාවට සබැඳි(link) යවමින් සිටින බව පෙනීගොස් තිබේ.
ඒ අනුව අදාළ වෙබ් අඩවිය මගින් පුද්ගලයන්ගේ සම්පූර්ණ නම්, උපන් දින සහ සම්බන්ධතා අංක වැනි පෞද්ගලික තොරතුරු රැස් කර ඇත.
පරිගණක හදිසි ප්රතිචාර සංසදයේ ජ්යෙෂ්ඨ තොරතුරු ඉංජිනේරු චාරුක දමුණුපොල පවසන්නේ මෙම ව්යාජ වෙබ් අඩවිය අදාළ ව්යාජ පුවත නිර්මාණය කිරීම සඳහා ශ්රී ලංකා රජයේ ලාංඡනය සහ මැතිවරණ කොමිසමේ නම භාවිත කර ඇති බවයි.
වෙබ් අඩවිය විමර්ශනය කරන ලෙස මැතිවරණ කොමිසම දැනටමත් පරිගණක හදිසි ප්රතිචාර සංසදය වෙතින් ඉල්ලා ඇති බවත්, ඔවුන් එම වෙබ් අඩවිය ඉවත් කිරීමට කටයුතු කරමින් සිටින බවත් ඔහු පවසයි.
කෙසේවෙතත්, පරිගණක හදිසි ප්රතිචාර සංසදය නීතිය බලාත්මක කිරීමේ අධිකාරියක් නොවන බැවින්, එහි කාර්යභාරය තාක්ෂණික අංශයට සීමා වන අතර, ඔවුන්ට වෙබ් අඩවිය සෘජුවම ඉවත් කළ නොහැක.
‘තතුබෑම'(Phishing) යනු සමාජ ඉංජිනේරු විද්යාවේ ආකාරයක් වන අතර වෙනත් පාර්ශ්වයක් විසින් සංවේදී තොරතුරු හෙළි කිරීමට හෝ වෛරස්, ඇඩ්වෙයාර් හෝ කප්පම් මෘදුකාංග වැනි අනිෂ්ට මෘදුකාංග ස්ථාපනය කිරීමට මිනිසුන් රවටා ගන්නා වංචාවකි.
අදාළ වෙබ් අඩවිය අමෙරිකාවේ සත්කාරකත්වය දරන බැවින් සහ මැතිවරණ කොමිසම විසින් විධිමත් පැමිණිල්ලක් ගොනු කිරීමට අවශ්ය බැවින් වෙබ් අඩවිය ඉවත්කිරීමට යම් කාලයක් ගතවනු ඇති බව ජ්යෙෂ්ඨ තොරතුරු ඉංජිනේරු චාරුක දමුණුපොලගේ අදහස වී තිබේ.
අමෙරිකාවේ වෙබ් අඩවිය නිර්මාණය කිරීම මගින් අනිවාර්යයෙන්ම අයිතිකරුවන් එරට කේන්ද්ර කරගනිමින් සිටින බවක් අදහස් නොවන බව ද ඔහු සඳහන් කරයි.
එම හිමිකරුවන් ලෝකයේ ඕනෑම තැනක සිටිය හැකිය.
මෙම ව්යාජ වෙබ් අඩවිය ඊයේ රාත්රිය වන විටත් ක්රියාත්මක වී තිබිණි.
මෙය පිටුපස සිටින පුද්ගලයා හඳුනා ගැනීම සඳහා වෙබ් අඩවි හිමිකරුගේ තොරතුරු හෙළි කරන ලෙස ගූගල් සමාගමට බල කිරීමට සයිබර් අපරාධ විමර්ශන අංශයට අධිකරණ නියෝගයක් ලබා ගැනීමට අවශ්ය වනු ඇතැයි දමුණුපොල පවසයි.
පෞද්ගලික තොරතුරු සඳහා වන එවැනි ඉල්ලීම්වලට ප්රතිචාර නොදක්වන ලෙසත්, විශේෂයෙන් දෙවැනි සත්යාපනය ඉල්ලා සිටියහොත් ප්රවේශම් වන ලෙසත්, එවැනි අවස්ථාවන්හිදී මැතිවරණ කොමිෂන් සභාව කෙලින්ම සම්බන්ධ කර ගන්නා ලෙසත් පරිගණක හදිසි ප්රතිචාර සංසදය වැඩිදුරටත් ජනතාවට උපදෙස් දෙයි.
