රජයේ වියදම් සීමා කිරීම සම්බන්ධයෙන් භාණ්ඩාගාරය නිකුත් කර ඇති චක්‍රලේඛය දැඩිව පිළිපදින ලෙස ජනාධිපති රනිල් වික්‍රමසිංහ මහතාගේ උපදෙස් පරිදි ජනාධිපති ලේකම් සමන් ඒකනායක මහතා සියලුම රාජ්‍ය ආයතනවලට දැනුම් දී ඇත.
ජනාධිපති ලේකම්වරයා විසින් අමාත්‍යාංශ ලේකම්වරුන්, දෙපාර්තමේන්තු ප්‍රධානීන්, පළාත් ලේකම්වරුන්, සංස්ථා සභාපතිවරුන්, ආයතනික මණ්ඩල සහ රජය සතු වෙළඳ ආයතන වෙත මෙම තොරතුරු දැනුම් දී ඇත.
රට මුහුණ දී සිටින ආර්ථික අභියෝග ජය ගැනීම සඳහා ආධාරයක් ලෙස රජයේ වියදම් සීමා කිරීමේ අවශ්‍යතාවය මත මෙම පියවර ගෙන තිබේ.
රජයේ කාර්යාල සඳහා නව ගොඩනැගිලි බදු දීමට පෙර හෝ නව බදු හෝ බදු ගිවිසුම්වලට එළැඹීමට පෙර නැවත දැනුම් දෙන තුරු සහ රජයේ අවශ්‍යතා සඳහා වාහන සඳහා පවතින ගිවිසුම් දීර්ඝ කිරීමට පෙර භාණ්ඩාගාරයේ අනුමැතිය ලබා ගත යුතු බව ද ජනාධිපතිවරයා උපදෙස් දී ඇත. කඩදාසි භාවිතය හැකිතාක් අඩු කර ඒ වෙනුවට විද්‍යුත් සන්නිවේදනයට යොමු වන ලෙස ද ජනාධිපතිවරයා රාජ්‍ය ආයතනවලට දැනුම් දී තිබේ.
රාජ්‍ය ආයතනවල ඉන්ධන, විදුලිය, සන්නිවේදන පහසුකම් ඇතුළු සේවා භාවිතය සම්බන්ධයෙන් දැඩි පාලනයක් පනවන ලෙස ද දන්වා ඇති ජනාධිපතිවරයා, සමාජයේ දුප්පත්කමෙන් පීඩාවට පත් ජනතාවට සහන සැලසීමට හැකිතාක් කැපකිරීම් කරමින් රාජ්‍ය අංශය ද ආදර්ශමත් විය යුතු බව දන්වා තිබේ.
