විදේශීය ත්‍රස්තවාදී සංවිධානවල අනුදැනුම මත, සංචාරකයන් ගැවසෙන ප්‍රදේශ ඉලක්ක කර ගනිමින් රට තුළ ප්‍රහාරයක් සැලසුම් කළ බවට සැකපිට තවත් සැකකරුවන් දෙදෙනකු අත්අඩංගුවට ගත් බව ත්‍රස්ත විමර්ශන කොට්ඨාශය කොළඹ මහේස්ත්‍රාත් අධිකරණයට දැනුම්දුන්නේය.
ආරක්ෂක අමාත්‍යවරයාගේ නියෝග මත සැකකරුවන් දින 90ක රැඳවුම් නියෝග යටතේ වැඩිදුර ප්‍රශ්න කිරීම සඳහා රඳවාගෙන සිටින බව පොලිසිය අධිකරණයට දන්වා සිටියේය.
ආරුගම්බේ සිද්ධියට අදාළ වැඩිදුර විමර්ශන පිළිබඳ රහස්‍ය වාර්තාවක් අපරාධ පරීක්ෂණ දෙපාර්තමේන්තුවේ ත්‍රස්ත විමර්ශන කොට්ඨාසයේ නිලධාරීහු අතිරේක මහේස්ත්‍රාත් පසන් අමරසේකර වෙත ඉදිරිපත් කරනු ලැබූහ.
ත්‍රස්තවාදය වැළක්වීමේ පනතේ විධිවිධාන යටතේ මෙම සැකකරුවන් අත්අඩංගුවට ගෙන ඇති අතර, වැඩිදුර විමර්ශන කටයුතු කරගෙන යෑමට මහේස්ත්‍රාත්වරයාගේ අවසරය ලබාදෙන ලෙස පොලිසිය අධිකරණයෙන් ඉල්ලා සිටියේය.
විදෙස් සංචාරකයන් බහුලව ගැවසෙන කලාපයක් ඉලක්ක කර ගනිමින් සැලසුම් කර ඇති ත්‍රස්ත ප්‍රහාරය සම්බන්ධයෙන් වන නඩුවට අදාළ විශේෂ මෝසමක් ගොනුකරමින් රපොලිසිය මෙම තොරතුරු ඉදිරිපත් කර ඇත.
ත්‍රස්ත විමර්ශන කොට්ඨාශය විසින් ඉදිරිපත් කරන ලද තොරතුරු සහ විශේෂ වාර්තාව සමාලෝචනය කළ අතිරේක මහේස්ත්‍රාත්වරයා විමර්ශනවල ප්‍රගතිය නියමිත වේලාවට අධිකරණයට ඉදිරිපත් කරන ලෙස පොලිසියට නියෝග කර විමර්ශන ගොනුව සටහන් කර තැබීය.
මේ අතර, ආරුගම්බේ සිද්ධිය සම්බන්ධයෙන් මේ වන විට සැකකරුවන් 6 දෙනෙකු අත්අඩංගුවට ගෙන ඇති බව නියෝජ්‍ය පොලිස්පති සහ පොලිස් මාධ්‍ය ප්‍රකාශක නීතීඥ නිහාල් තල්දූව ප්‍රකාශ කළේය.
සඳුදා (28) මාලදිවයින් ජාතිකයකු අත්අඩංගුවට ගත් බවත්, සැකකරුවන් රැඳවුම් නියෝග යටතේ රඳවාගෙන ප්‍රශ්න කරන බවත් පොලිස් මාධ්‍ය ප්‍රකාශකවරයා සඳහන් කළේය.
