ඉන්දීය ටෙස්ට් ක්රිකට් කණ්ඩායමේ නිත්ය නායක රෝහිත් ෂර්මා ජාත්යන්තර ටෙස්ට් ක්රිකට් පිටියෙන් විශ්රාම යෑමට තීරණය කර ඇත.
ඉන්දීය කණ්ඩායම ඉදිරියේදී සිදුකිරීමට නියමිත එංගලන්ත තරග සංචාරයෙන් රෝහිත් නායකත්වයෙන් ඉවත් කරනු ඇති බවට ඉන්දීය මාධ්යවල වාර්තාවල පලවීමෙන් පසුව ඔහු මෙම තීරණය ප්රකාශයට පත්කර තිබේ.
කෙසේ නමුත් රෝහිත් තවදුරටත් එක්දින ජාත්යන්තර තරග සඳහා දිගටම ක්රීඩා කරනු ඇති බව සඳහන්.
රෝහිත් සිය ටෙස්ට් හිස්වැස්ම සහිත ඡායාරූපයක් ඔහුගේ Instagram ගිණුමේ පලකරමින් “සුදු ඇඳුමින් සැරසී මගේ රට නියෝජනය කිරීමට ලැබීම ගෞරවයක්” දක්වමින් සිය සමුගැන්ම තහවුරු කර ඇත.
“වසර ගණනාවක් පුරා ඔබ දැක්වූ ආදරය සහ සහයෝගයට ස්තූතියි” යනුවෙන්ද එහි සඳහන් කර තිබේ.
2024 වසරේ පැවති විස්සයි20 ලෝක කුසලානයෙන් අනතුරුව ඔහු T20 ජාත්යන්තර තරග බිමෙන්ද විශ්රාම ගියේය.
එවර තරගාවලියේදී ඔහුගේ නායකත්වය යටතේ ශූරතාව දිනාගැනීමට ඉන්දියාව සමත් විය.
මේ වනවිට 38වන වියේ පසුවන රෝහිත් ටෙස්ට් තරග 67ක ඉනිම් 116කදී ඉන්දියාව වෙනුවෙන් ක්රීඩාකර ඇත.
එහිදී ලකුණු 4301ක් රැස්කර ඇති රෝහිත්, ශතක 12ක් හා අර්ධ ශතක 18ක් වාර්තාකර තිබේ.
රෝහිත්ගේ නායකත්වය යටතේ ඉන්දියාව පසුගිය වසරේ දී සිය මව්බිමේදීම නවසීලන්තය හමුවේ තරග 3-0ක අවමන් සහගත පරාජයක් ලැබීමත්,
ඔස්ට්රේලියාවේ පැවති බෝඩර්-ගවස්කාර් කුසලානය තරග 3-1ක් ලෙසත් පරාජයවීමත් හේතුවෙන් රෝහිත්ගේ නායකත්වය මෑත කාලයේදී දැඩි කථාබහකට ලක්විය.
රෝහිත් ශර්මා ජාත්යන්තර ටෙස්ට් ක්රිකට් පිටියෙන් විශ්රාම යෑමෙන් පුරප්පාඩුවන ඉන්දීය ටෙස්ට් නායකත්වය සඳහා ශුබ්මන් ගිල් ඉදිරියෙන් සිටින බව ඉන්දීය මාධ්ය වාර්තා සඳහන් කරයි.
එම වාර්තා පෙන්වා දෙන්නේ ඉන්දීය හිටපු තුන් ඉරියව් ක්රීඩක අජිත් අගාකර්ගේ සභාපතිත්වයෙන් යුත් වත්මන් ඉන්දීය ජ්යෙෂ්ඨ ක්රිකට් තේරීම් කමිටුව 25 හැවිරිදි ශුබ්මන් ගිල් ටෙස්ට් නායකයා ලෙස නම්කිරීමට වැඩි කැමැත්තකින් පසුවන බවයි.
කෙසේ වෙතත් නිල නිවේදනයක් නිකුත් කිරීමට පෙර තේරීම් කමිටුව ඒ පිළිබඳව ඉන්දීය ක්රිකට් ආයතනය (BCCI) සමග සාකච්ඡා කරනු ඇති බව වාර්තා වේ.
ටෙස්ට් නායකයා ලෙස ගිල් පත් කරනු ලැබුවහොත්, ඔහුගේ පළමු වගකීම එංගලන්තයේ දී පැවැත්වෙන තරග 5කින් යුත් ටෙස්ට් තරගාවලිය වනු ඇත.
වයස අවුරුදු 21දී ඔස්ට්රේලියාවට එරෙහිව ටෙස්ට් වරම් දිනාගත් ගිල්, මේ වනවිට ඉන්දියාව නියෝජනය කරමින් ඉනිම් 59කට ක්රීඩාකර ඇත.
එහිදී ශතක 5ක් හා අර්ධ ශතක 7ක් වාර්තාකර තිබේ.
මේ වනවිට ගිල්, ලකුණු 1893ක් රැස්කර 35.05ක පන්දුවට පහරදීමේ සාමාන්යයක් පවත්වාගෙන සිටියි.
