නීතිවිරෝධී ලෙස උපයාගත් වත්කම් හෝ සුඛෝපභෝගී ජීවන රටාවක් ගතකරන පුද්ගලයන් පිළිබඳ තොරතුරු ලබාදෙන ලෙස ශ්රී ලංකා පොලීසිය පසුගිය ජූලි 09 වනදා නිකුත් කළ නිවේදනය වහාම ඉල්ලා අස්කර ගන්නා ලෙස එක්සත් ජාතික පක්ෂය ඉල්ලීමක් කරයි.
එම පක්ෂය පෙන්වා දෙන්නේ නිසි මාර්ගෝපදේශවලින් තොරව නිකුත් කර ඇති මෙම ප්රකාශය හේතුවෙන් ග්රාමීය ජනතාව දැඩි හිරිහැරයට හා බියගැන්වීමට ලක්වීමේ අවදානමක් පවතින බවයි.
එක්සත් රාජධානියේ ස්වාධීන පරීක්ෂණ වාර්තාවේ (Report of Independent Inquiry) එන ‘පොදු අරමුණු පිළිබඳ ප්රකාශයට’ (Statement of Common Purpose) අනුව පොලීසියේ ප්රධාන කාර්යය වන්නේ නීතිය හා සාමය සුරැකීම, නීතිවිරෝධීන් නීතිය හමුවට පැමිණවීම සහ සාමය පවත්වාගෙන යාම බවත් පොලීසියේ මෙම නිවේදනය මඟින් එකී මූලධර්මය උල්ලංඝනය වන බව එජාපය සඳහන් කරයි.
ශ්රී ලංකාවේ වත්කම් බද්දක් (Wealth Tax) නොමැති අතර, ගම්බද බොහෝ පිරිස් විදේශ රැකියා වැනි විවිධ නීත්යානුකූල මාර්ගවලින් වත්කම් උපයා ගනිති.
බදු ක්රමය පිළිබඳ අවබෝධයක් නොමැතිකම නිසා ඇතැම් අය තමන් උපයාගත් වත්කම් ප්රකාශ කර නොතිබීමටද ඉඩ ඇත.
පැහැදිලි නීත්යානුකූල ආදායම් මාර්ගයක් නොමැතිව උපයාගත් වත්කම් මොනවාදැයි තීරණය කිරීමට භාවිත කළ හැකි නිශ්චිත ක්රියාපටිපාටියක් නොමැති අතර, මෙය මහජනතාව හිරිහැරයට ලක් කිරීමේ මෙවලමක් විය හැකි බවට පක්ෂය අනතුරු අඟවයි.
මෙවැනි නිවේදනයක් නිකුත් කිරීමට ප්රථම පොලිස් මත්ද්රව්ය කාර්යාංශය, දේශීය ආදායම් දෙපාර්තමේන්තුව සහ නීතිපති දෙපාර්තමේන්තුව සමඟ සාකච්ඡා කර වඩාත් නිශ්චිත මාර්ගෝපදේශ සකස් කළ යුතුව තිබූ බව එක්සත් ජාතික පක්ෂය වැඩිදුරටත් පෙන්වා දෙයි.
එබැවින්, වත්මන් නිවේදනය වහාම ඉල්ලා අස්කරගෙන ජනතාව හිරිහැරයට ලක්නොවන පරිදි වඩාත් නිශ්චිත හා පැහැදිලි ප්රකාශයක් නිකුත් කරන ලෙස පක්ෂය පොලීසියෙන් ඉල්ලා සිටී.
